وراث الأرض

في حِتّه من جِسم الأرِض
والناس تفتِّش عن حِلوول
والناس زي ما تقول يدابا
عايشه في حالة ذهول
والدنيا لِسّه في عِز شبابا
من قبلِ ما تبدا الفصول
من قبل ظهور الخلقِ طُراً
من قبل ميلاد رسوول
من بداية الخلقِ كُنّا
والدنيا لسه سديم وليل
كان بداية الدنيا أنِحْنا
وكان أساس الدُنيا زول
كان في نيل وشجر نخيل
وأرض مُخضرّه وحِقول
وزرعِ يانع عيش وفول
وهرم يحكي عن مجد اثيل
وإرثِ شامخ سامي ونبيل
وكان وكان بلادنا جنّه
وروضه غنّا وظِل ظليل
في حِتّه من قلب الارِض
والناس تتاوِق للوصووول
كان في ناس أصحاب عقول
رُماة حَدَقْ فرسان خيول
أسألوا التاريخ عن وطنّا
أسألوا التاريخ هو البِقول
عن حضاراتنا القِبيل
عن جدودنا جيل فجيل
عن رجاال وضعوا بصمه
وفي حِماها دروع وخيل
أنِحنا في التاريخ فحول
نحنا للبشريه معبر دخول
أنِحنا جيناتنا بصمة ودليل
آثارنا خاااالده وما بتزول
وصفحتنا زاهية بخط جميل
أنِحنا أول ومييين يطول
أنحنا غيث ومطر هطول
انِحنا فِرسان فِعِل وقول
كلماتك أبوليلى