#قصص_البشاقرة_شرق
قصة حبوبتي صيدة (ست) النفور بت طه ود الحسين، الملقبة بالبطحانية، نسبة لزوجها طه ود القدلي البطحاني من النمام أبو دليق.
سألتها: إتي يا حبوبتي الوداك للبطاحين شنو؟
“القسمة والنصيب يا العبد (لقبي) يا ولدي.”
“البشاقرة مشرع للبهايم. يوم البطاحين وردوا يسقوا بهايمن، واتلقطوا مع أولاد البشاقرة. طه راجلي الشفتو دا كان أقواهم. واحد من أولاد البشاقرة لقطوا بي بيضة فرار، رماهو نجيض. درافين البطاحين ختفوهو وجروا بيهو جري على التمام.
الخبر وصل لي جدك أحمد ود العجيل. جمع أعيان البشاقرة، وبعد صلاة الصبح طوالي على التمام.
(السلام عليكم ورحمة الله وبركاته.) قالها ود العجيل.
(مرحبتين حباب الضيوف. اتفضلوا. الموية آجنيات. جيبوا الزاد للضيوف.) قالها شيخ القدلي.
(يا شيخ العرب، والله موية ما بنشربا وأكل ما بناكلو، علا نشوف طه بي عيوننا.) قالها ود العجيل.
جا طه راسو مربوط وميرود. كان معاهم طلحة ود حمد البصير، ود العجيل قال ليهو يشوف الضربة ويعالجها.
بعد ما اتكفوا، ود العجيل قال للبطاحين: (الجمعة الجاية كرامة طه عندنا في البشاقرة.)
وفعلا حضر البطاحين، وأهلك عاد بتعرفن سووا الما بقى.
(يا ود العجيل، ما عندك بت نعرسها لي طه ولدي؟) سأل شيخ القدلي.
(والله بناتي من صلبي صغار، ما بقن للعرس، علا عندي ربيبتي، أخت مرتي، لاحق.)
(نادوها لينا.) طلب شيخ القدلي.
كنت أغسل في العدة، كوركوا لي: هابت قومي اتشطفي، البطاحين دايرينك.
دخلت عليهم في خلوة جدك أحمد.
(اسمك منو آصبية؟) سألني شيخ القدلي.
ست النفور بت طه. جاوبته.
التفت إلى ابنه طه، الذي كان يقف خلفه وظهره مع الحيطة: (بتدورها؟)
(آآي بدورها.) كان رد طه ولدو.
(ود العجيل، نادوا المأذون.)
بعد العقد والغدا، وقف شيخ القدلي وقال:
(يا أهلنا ناس البشاقرة، الجمعة الجاية بنجي نسوق مرتنا، وباكر بجيكم المهر.)
ومن ديك السوقا الياها.
منقول من صفحة د/ محجوب أحمد إدريس عدلان، من كتابات الوالد
(أ. #أحمد_إدريس_عدلان)
البشاقرة شرق الوثائقية
#منقول
ـــــــــــــــــــــــــــــــــــــــــــــــ
