حسن إسماعيل يكتب…
عشان تعرف كيف الملايش اتفاجأوا بالجيش فوق رأسهم
1. المليشيا كانت مفتكره شنو
كانت مفتكره الجيش يهجم من شرق مدينة النهود
جهز ناس في الخنادق كانوا قاعدين ومفتكرين إنو الجيش حيعمل زي زمان يجي بـعربات من قدام يدخل في حقل القناصين
والقناصين يضربو العربات والعربات تتدمر والجيش يرجع وكانوا مجهزين خنادق في اتجاه واحد بس الاتجاه الشرقي الجاي من الأبيض.
2. الجيش عمل شنو؟ قلب الطاولة عليهم الجيش ما هجم من قدام زي ما هم متوقعين، عمل 4 ضربات ورا بعض
الضربة الأولى: من فوق
الطيران الحربي والمسيرات ما ضربت الخنادق ضربت المخازن جوه النهود
ضربت الوقود والذخيرة والأكل يعني قطع الحبل السري بتاع الخنادق
القناص القاعد في الخندق، بقى ما عندو ذخيرة زيادة، ولا أكل، ولا موية، ولا اتصال بالقيادة
الضربة الثانية: قطع الإمداد
الجيش استلم أبكورة وعيال بخيت يعني قفل الطريق البجيب الإمداد من نيالا والضعين للنهود
الخنادق بقت جزيرة معزولة لا إمداد بيجيها من ورا، ولا إمداد بيجيها من قدام
الضربة الثالثة: الهجوم من الشمال والجنوب
ودي الحركة الذكية الجيش ما هجم من الشرق زي ماهم متوقعين قوة مشت من الشمال من اتجاه أم لبانة قوة مشت من الجنوب من اتجاه عنكوش وفوجا
يعني الخنادق اتحاصرت القناص بقى ما عارف يضرب ياتو اتجاه، يضرب الشمال ولا الجنوب
الضربة الرابعة: المشاة دخلوا
بعد ما القناصين جاعوا وتعطشوا وقطعت ذخيرتهم واتشتتوا بين شمال وجنوب
المشاة بتاعين العمل الخاص + درع السودان دخلوا على الخنادق وهي منهكة
النتيجة شنو
القناصين ما لقوا عربات يضربوها لأنو العربات ما جات من قدام لقوا نفسهم محاصرين وجعانين، ومقطوعين
فيهم المات في القصف وفيهم الهرب وخلى الخندق، وفيهم الاستسلم
وده اسمو في العسكرية: عزل، تجويع تطويق، اقتحام
ما اسمو “هجوم مباشر”.
الخلاصة: الدعم السريع كان مجهز مصيدة من قدام، الجيش ما وقع فيها الجيش ضرب المخازن جوه قطع الإمداد ولف عليهم من شمال وجنوب، وسحق الخنادق وهي معزولة وده نفس التكتيك العملو الجيش في الجزيرة وسنجة عشان كده الخطة نجحت.
#طيبة #السودان
