
حد فاكر الكوبانية؟
الكوبانية.. كلمة يمكن يكون اختفت من كلامنا، أو جيل كامل ما سمعش عنها ولا يعرف معناها.. الكوبانية كانت بنزينة القرية زمان
من الكوبانية كانت بتخرج عربية الجاز، عربية عليها برميل كبير، يجرّها حمار، وقاعد عليها الراجل المسؤول عن البيع، ومعاه المعيار؛ لتر أو لترين أو خمسة لتر، يلف بيها شوارع القرية، والناس تستناه علشان تشتري احتياجها من الجاز الأبيض أو الكيروسين
زمان كان لكل أسرة حصة من الجاز بتتصرف بكوبونات التموين، والراجل يملا المعيار ويبيع حسب الكمية المطلوبة. أما ربع صفيحة أو نص صفيحة أو صفيحة كاملة، فدي كانت كميات أكبر تُستخدم لمكن الري والجرارات الزراعية، زي جرار أبو قبقاب بتاع زمان
والجاز ماكانش للبيوت والجرارات بس، ده كان فيه عربيات فورد أم مانفيلا اللي كانت بتشتغل بالجاز أو الكيروسين .. عربية كانت مهمتها نروح بها المدينة او بين القري وتشيل 5 راكب بس فعليًا عشرين او خمسة وعشرين راكب .. دي لوحدها حكاية تراث قرية
وساعات فيه ناس كانت تمتلك عربية زي اللي في الصورة وتروح تشتري من الكوبانية وتلف تبيع يعني زي تاجر للجاز زمان .
#أيام_قرية #نستولوجيا #مصر #زمان #تراث



