الأخبارالأخبار المحليةالرأي والتحليل

في ناس في الشرطة، الناس بتشوفهم كل يوم، لابسين الكاكي، واقفين في الشارع، في نقاط التفتيش، في الأسواق.

الكاردينال نصر يكتب/

الكاردينال نصر يكتب/

في ناس في الشرطة، الناس بتشوفهم كل يوم، لابسين الكاكي، واقفين في الشارع، في نقاط التفتيش، في الأسواق.

وفي ناس تانيين، ما بتشوفهم. ما بتعرفهم. ما بتعرف هم شغالين وين، ولا بيعملو في شنو. ودي هي الشرطة الأمنية.

الشرطة الأمنية ديل، شغلهم ما في الشارع، شغلهم في الخفاء .

الزول فيهم، بكون قاعد جنبك في القهوة، وانت ما عارفو، بكون راكب معاك في المواصلات، وانت ما عارفو، بكون واقف معاك في السوق، وانت ما عارفو.

ما لابس كاكي، ما شايل كلاش، ما بصرخ، ما بعمل هيبة. لابس زيك، وبيتكلم زيك، وبيضحك زيك. لكن عينو ما زي عينك. عينو بتشوف الحاجة قبل ما تحصل.

الشرطة الأمنية، ديل الناس البعرفو إنو في حاجة ح تحصل، قبل ما تحصل.

بيعرفو الزول الجاي يخرب، قبل ما يخرب. بيعرفو العصابة الجاية تسرق، قبل ما تسرق. بيعرفو الخلايا النايمة، قبل ما تصحى. بيعرفو المخدرات جاية من وين، وماشة وين، ومنو وراها.

شغلهم، ما ضرب نار، شغلهم جمع معلومة. المعلومة دي، والله أخطر من الرصاصة. الرصاصة بتقتل زول واحد، المعلومة بتحمي بلد كاملة.

الزول في الشرطة الأمنية، بكون عايش حياتين. حياة قدام الناس، إنو زول عادي، موظف، تاجر، طالب. وحياة تانية، ما بيعرفها غير هو وربو ومديرو. حياة كلها خطر، وكلها سهر، وكلها وجع راس.

ما بقدر يحكي لأمو هو شغال شنو بالضبط، لأنو لو حكى، ح يخوفها. وما بقدر يحكي لمرتو، لأنو لو حكى، ح تقلق. وما بقدر يحكي لصاحبو، لأنو الشغل دا أسرار. عشان كدا، بكون شايل همو براهو، وساكت.

أنا بعرف ناس من الشرطة الأمنية، والله، الواحد فيهم بكون قاعد في بيتهم، وتلفونو يدق الساعة 2 بالليل، يقوم يلبس ويطلع، ومرتو ما تسألو ماشي وين، لأنها عارفة إنو لو قال ليها، ما ح تفهم، ولو ما قال ليها، ح تقلق. بس بتقول ليهو: “ربنا يحفظك”، وهو بقول ليها: “ادعي لي”.

وفي ناس، بتقول الشرطة الأمنية ديل ناس شنو؟ ناس قاعدين ساي؟ لا والله، ديل ناس لو غلطوا غلطة واحدة، بلد كاملة ممكن تدفع التمن.

هم خط الدفاع الأول، قبل ما الرصاصة تطلع، قبل ما القنبلة تنفجر، قبل ما الشارع يولع. هم البمنعو الحاجة قبل ما تحصل.

الحية لكل أبطال الشرطة الأمنية 🔥

هشام احمد المصطفي(ابوهيام ) رئيس التحرير

من أبرز المنصات الإلكترونية المخصصة لنقل الأخبار وتقديم المحتوى الإعلامي المتنوع والشامل. تهدف هذه المنصة إلى توفير الأخبار الدقيقة والموثوقة للقراء في جميع أنحاء العالم العربي من خلال استخدام التكنولوجيا الحديثة والأساليب المبتكرة في عرض الأخبار.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى