كتبت ذات مرة على صفحتي بالفيسبوك (ساندوتش) خفيف اقول فيه :- (عندما تختفي محلات العماري الجيد وقتها يمكنني القول بان السودان يتقدم و شعبه يتحرر من قيود السعوط ويتجه للصعود)
و احسب صادقاً ان (السعوط) او التمباك له تاثير كبير في حياة السودانين و لا اريد الخوض في تفاصيل هذا التاثير ومدي سلبيته او ايجابيته او حتي ضرورة منعه او اباحته (لانو دا ما موضوعنا ).
وبما ان (التمباك) في السودان مناطق زراعته في غرب السودان ويُقال ان اهل غرب السودان (الغرابة) يتأففون منه و لا يتناولونه ربما لان المهدي قد حرمه… كما ان الاهل بالعيلفون يحتفون (بالاجهورية) وصاحبها جدهم (ود الارباب المحسي الماكضاب) و يقولون ان الاجهورية هي اول جائزة علمية في السودان وهي مهداة من مفتي الازهر الشريف الشيخ علي الاجهوري للشيخ ادريس بن محمد الارباب (راجل العيلفون الاسرع من التلفون) كجائزة عن فتواه في تحريم التمباك…. والقصة طويلة … و لا أدري هل الاجهورية موجودة الان في بيت الخليفة ام جني عليها ( الشفشافة و جيش دعمهم السريع) الذي ربما يستخدم التمباك كسلاح جديد في حربه ضد المواطن السوداني.
ولكن عزيزي القارئ دعنا نتخيل لو تم اصدار قرار حربي و ثوري قوي الان او في وقت سابق او لاحق ،(فالموضوع مجرد خيال وفنتازيا) و القرار يمنع تعاطي التمباك او سن قانون لتنظيم تعاطي التمباك علي نهج ( تنظيم النسل) او بفهم اخر ان يدخل التمباك ضمن سلع التموين ويضبط بدفاتر وحصص محددة ربما يظهر معها نوع جديد من (الفساد التمباكي) وكثير من( اللكلكة والجرجرة) مثل فساد حصص تموين السكر والدقيق والسلع الضرورية الشهيرة في كثير من الحكومات والسياسات العقيمة
فماذا تتوقع عزيزي القارئ؟؟
هل من المتوقع ان تقوم مظاهرات علي شاكلة( تلاتة عُقر غلوا السكر) وربما تظهر لافتات ضخمة تقول
*الهلاك او عودة التمباك* او اخري ترفعها الجاليات السودانية في الدول اجنبية فالتمباك هو الكائن الوحيد الذي يزور الجالية في كل العالم وقطعاً ستكون لهم هتافات داوية ولافتات عريضة تقول
(باك باك للتمباك)* بكل اللغات
وربما تظهر ادبيات و اشعار علي نهج و وزن
(لو حاول زول يتجرأ يهدد سيرنا ويمنع
حندلي الغصن الاخضر ونعبئ في لحظة المدفع)
وعلي ذات المنوال سوف نسمع شاعر الحزب يقول:-
لو حاول زول يتجرأ يجدع كيسنا و يمنع
بي سفة كبيرة نكيف الراس الخاوي الاصلع
وكثير من المظاهر يمكن تخيلها (معليش معليش تمباكنا شالوا الجيش)
وهتاف اخر داوي (يا قائد الجيش التمباك وكيس العيش )….و (اهو كلها اكياس ) ربما يضف لها قطاع اخر عريض كيس الموز يهتف معارضاً (لا يجوز لا يجوز والتمباك بديلو الموز)
وقطعاً رغم ان كمية (السفافين) تمثل الاغلبية في السودان ولكن نتوقع مظاهرات مضادة وغرف اعلامية وتضخيم لمخاطر السعوط المهلكة التي اودت السودان الي التهلكة ..واترك لخيالكم كل السيناريوهات المحتملة… و نكات التمباك الكثيرة واشهرها علي الاطلاق (بسف وبطلق ذاااتو) ومنها ايضاً
( آآي نان دي كرميللي)
و لطائف وطرائف ناس التمباك كتيرة (لكن دا برضو ما موضوعنا)…
طيب ..ما هو الموضوع؟؟
هذا السؤال الاجابة عليه في المقال القادم الذي ربما يرتبط بصديقنا بابكر خليل مكي المحامي وموثق العقود الملقب ب(سلك) و هو صاحب العمود الصحفي الرياضي الشهير (في السلك )..
طبعاً أنا عارف عنوان المقال و داكم وين ؟؟؟
لكن حتي نهاية المقال ما جبت سيرتو!!!!!
انتظرونا غداً مع كم من السلوك والسلوكيات…. و(السلكلك الملكلك).
