
مشكلة الدقيق في القضارف
سببها حكومة الولاية وبالاخص وزارة المالية.
وإذا استمر الحال بالشكل دا العيشتين بي جنيه ما بتلقوها
الانو أغلب الأفران خرجت خارج الخدمة بسبب نقص الدقيق وزارة المالية قبل فترة قالت بتوفر دقيق مدعوم للأفران
ودا خلى شركات الدقيق (سيقا) و(سين) البتستورد الدقيق للأفران في الولاية تغير نظامها.
ونظامها كان الأفران تشيل دقيق وتشتغل وبعداك تورد
وبعدما سمعوا كلام المالية إنو حتجيب دقيق مدعوم.
طوالي سحبوا الامتاذ دا من الأفران وقالوا بعد كدا العندو قروش يجي يشتري بالكاش ويشتغل والما عندو يقفل.
والحكومة اتأخرت في جلب الدقيق وحصلت فجوة في السوق وسعر الدقيق غلى جدا، ودا الخلى العيشتين تبقى بجنيهة وصغيرة جدا .
والدقيق لمن وصل المخازن التوزيع كان غير نزيه وظهر الديناصورات اصحاب المصالح وافران كتيرة داخل الأحياء ما جاها الدقيق وقفلت.
وفي بعض أصحاب الأفران فاتوا عديل لي مدير شعبة المخازن وبدأت الجرجرة بتاعت المكاتب امشوا وتعالوا بكرة
وانتظروا مدير الإدارة الاقتصادية وفي النهاية قالوا ليهو الدقيق أصلًا ما جابوهو للأفران وما عندنا ليكم حاجة.
وطبعاً العندو قروش رجع اشترى دقيق بالغالي ويبيع عيشين بي جنيه وصغيره جداً جداً جداً، والما عندو قروش قفل.
وإذا استمر الحال بالشكل دا، وسعر الدقيق حاليا كل يوم مرتفع فالعيش بي جنيه في القضارف ما بتلقي
ودا كلو بسبب الأزمة البتصنعها سلطة القضارف وماليتها.



