بروفيسور محمد عبد الله الريح، هو رائد الكتابة الساخرة في السودان، فهو أول من “تخصص” في هذا الأسلوب الكتابي، واشتهر باسم حساس محمد حساس. والرجل أستاذ في علم الحيوان ولكنه متنوع وغزير المعارف. وهنا يقول ود الريح إن النصائح التالية صدرت من شخص متخصص في الركلات الترجيحية. اول حاجة: ما تقعد تعاين لي روحك في المرايا كتير وفي الطلعة والنزلة.. شكلك دا ما ح يتصلح وحيمشي طوالي في الماينس، ولمعلوميتك كل اعضاء جسمك حا تتوقف عن النمو تماما الا عضوين هما: النخرة والاضنين.. بعدين ما تقعد تتزهج وتشاكل في ناس البيت لانه العواليق ديل ممكن يزهجوا منك ويتجاهلوك عاااااادى.
ما تتمارض وتتشكى كل دقيقة.. المشاكل الصحية في السن دي واردة.. وفي اوجاع وعاهات صغيرة كدة اكلها في حنانك وأصبر.
ما تقعد في البيت كتير حاول امرق لاي سبب إن شاءالله تلف في الشارع ساي و ترجع.
بعدين كان جو ضيوف لي ناس البيت ما تقعد تتحكر في نصهم وتحكي عن بطولاتك و ذكرياتك لانو واضح انها بقت قصص مملة و بايخة، خاصة للاجيال الجديدة.
ما تتشوبر ساي في حاجات انت ما بتقدر تعملها ولو رسلوك الدكان او الفرن امشي من سكات لانو دي حتكون واحدة من مهامك اليومية لحدي ما تجلس.
ما تتشالق وتقوم تنّزل ليك كرتونة من راس الدولاب ولا تقوم تركب لمبة لانو ببساطة لو جيت داقي الدلجة تاني ما بتقوم ليك قايمة في الدنيا دي!!!!
اوعك تنوم براك في الاوضة، ولو نمت براك خلي باب الاوضة مفتوح وكذلك باب الحمام ما تقفلوا بالترباس، عشان لو كوركت الناس يسمعوك ويلحقوك.
كتر من المشي للجامع لانه ده المكان الوحيد الفيهو تقدير لأمثالك.
لو لاقاك زول فجاة و ليك زمن ما لاقيتو ما تسلم عليهو بي اسمو . لانو في الغالب اسمو بكون راح ليك من زمااااان.
واسمع نصيحتي ما تقعد تبعبص في الموبايل وتلخبطو، اديهو لأي واحد من الشفع خلي يظبطو ليك.
ما تعمل فيها رايح لوسألوك من عمرك. ما خلاص مافي فايدة الحصل حصل .
اقعد اكتب مذكراتك احسن ليك. لانو بعد شوية ما حا تتذكر اي حاجة..
أوعك تتوضا في حوض غسيل اليدين لانو لوجيت تغسل كراعك وجيت واقع ،، تاني ما بتقوم ليك قايمة. امسح بس. في مسنين كتار جلسوا بسبب الحركة دي بالذات خليك خفيف اتخلص من بناطلينك و قمصانك وبدلك لأنك تاني ما حا تلبسها و ركز مع الجلاليب و العراريق و الطواقي والعمم والملافح.
ما تقعد كل يوم تلم اصحابك الجلاكين والكوامر في صالون البيت و شاي و قهوة وجوطة وذكريات. احسن تخت ليهم كراسي في الشارع و اقعد معاهم. عشان تقللوا من الازعاج في البيت واهو برضو تتفرجوا وتتسلوا شوية.
أخيراً ألزم صلاتك في مواعيدها واقرأ القرآن واذكر الله كثيرا. لأنو دى الحاجة البتنفعك بعد كدة (نحن في بداية سنة جديدة وعمري بقى 39 سنة ويومين، وما عندي شغلة بالكلام الفوق دا الجاني من د. حسن الجزولي ومبارك الهلالي).
